2 საუკუნეზე მეტია, საქართველოს რუსეთის განგრძობადი აგრესიის პირობებში უწევს არსებობა. ამ პერიოდის განმავლობაში საქართველომ რუსეთთან ათობით ომი და იმპერიული მარწუხების წინააღმდეგ წამოწყებული რამდენიმე დიდი აჯანყება გამოიარა. რუსეთის იმპერიულ ამბიციებსა და დამპყრობლურ პოლიტიკას ასობით ათასი ქართველის სიცოცხლე შეეწირა. ფაქტია, რუსეთმა საქართველოს ბევრი ავნო და ქართველთა ისტორიულ მეხსიერებას ეს ახსოვს, მაგრამ ამავე ისტორიული მეხსიერებიდან გამქრალია ერთი ძალიან მნიშვნელოვანი ასპექტი - საქართველოს წინააღმდეგ რუსეთის პროპაგანდისტული ნარატივების ანატომია.

 

როგორც ერს, კარგად გვახსოვს რუსეთის მიერ ჩვენ წინააღმდეგ წარმოებული დაპყრობითი ომები, სისხლში ჩახშობილი ეროვნული აჯანყებები, დახვრეტილი ქართული ინტელიგენცია, საკუთარ ოჯახებს მოწყვეტილი და გადასახლებული ადამიანები, მაგრამ არ ვიცით და არ გვახსოვს, თუ როგორი პროპაგანდისტული ნარატივებითა და ტყუილებით გვიბნევდა რუსეთი თავ-გზას, რა იყო ამ ტყუილების შინაარსი და რამდენად ეფექტურად მუშაობდა ის ჩვენ წინააღმდეგ საქართველოს ისტორიის სხვადასხვა პერიოდებში.

​

დღეს შეიძლება ბევრს ეგონოს, რომ ნარატივები „გლობალურ ომის პარტიაზე“, „საქართველოს ომში ჩართვაზე“, „მეორე ფრონტზე“ „ტერიტორიების მტრისთვის ჩაბარებაზე“, "მთავრობის გაქცევაზე", „ქვეყნის გაძარცვასა“ და მთავრობის მიერ ოპოზიციის ხალხის მტრად გამოცხადებაზე მოქმედი ხელისუფლების მიერ შემუშავებული პიარ კამპანიისა და პროპაგანდის ნაწილია, მაგრამ სინამდვილეში, მას გაცილებით ღრმა ფესვები აქვს და რუსეთის კომუნისტურ იმპერიას უკავშირდება. ქართული ოცნების ხელისუფლებამ, ისევე როგორც ისტორიის სხვადასხვა ეტაპზე საქართველოში რუსეთთან დაკავშირებულმა ნებისმიერმა აქტორმა, სრულად შეითვისა ბოლშევიკების მიერ თავის დროზე საქართველოს თავისუფლების წინააღმდეგ შექმნილი პროპაგანდა.